Annamayya keerhanas Adivo Alladivo (Telugu)

రచన: అన్నమాచార్య

రాగం: మధ్యమావతి

అదివో అల్లదివో శ్రీ హరి వాసము

పదివేల శేషుల పడగల మయము ||

అదె వేంకటాచల మఖిలోన్నతము

అదివో బ్రహ్మాదుల కపురూపము |

అదివో నిత్యనివాస మఖిల మునులకు

అదె చూడు డదె మొక్కు డానందమయము ||

చెంగట నదివో శేషాచలమూ

నింగి నున్న దేవతల నిజవాసము |

ముంగిట నల్లదివో మూలనున్న ధనము

బంగారు శిఖరాల బహు బ్రహ్మమయము ||

కైవల్య పదము వేంకట నగ మదివో

శ్రీ వేంకటపతికి సిరులైనది |

భావింప సకల సంపద రూపమదివో

పావనముల కెల్ల పావన మయమూ ||